வானமர் திங்களும் நீரும் மருவிய வார்சடை யானைத்
தேனமர் கொன்றையினானைத் தேவர் தொழப்படுவானைக்
கானமரும்பிணை புல்கிக் கலைபயிலுங் கடம் பூரில்
தானமர் கொள்கையினானைத் தாள்தொழ வீடெளி தாமே.

என்று ஆளுடையப் பிள்ளையாரும்,

தளருங் கோளர வத்தொடு தண்மதி
வளருங் கோல வளர்சடை யார்க்கிடங்
கிளரும் பேரிசைக் கின்னரம் பாட்டறாக்
களருங் கார்க் கடம்பூர்க்கரக் கோயிலே

என்று அப்பர் பிரானும் அருளிச்செய்த கடம்பூர் அமிர்தகடேஸ்வரர் ஆலயத்திற்குச் சமீபத்தில் சென்றிருந்தேன். அவ்வாலய அமைப்பை ஆய்வுசெய்ததில் மிகவும் அரிதான வகையில் அமையப்பெற்ற கர்ணகூடுகள் கண்களையும் கருத்தையும் கவர்ந்தன.

இவ்வாலயமே ஒரு அற்புதமான கலப்பு விமானம் ஆகும். ஆதிதளம் நாகரமாகவும், இரண்டாம் தளம் திராவிடமாகவும், கிரீவம் மற்றும் சிகரம் வேசரமாகவும் அமைந்த அற்புத விமானமாகும்.



இவ்வாலயத்தில் அமைந்த கர்ணகூடுகளானது மற்றைய ஆலயங்களிலிருந்து பெரிதும் வேறுபட்டுக் காணப்படுகின்றன.



பூமிதேசத்தின் மேலெழும் ஆர உறுப்புகளில் நான்கு மூலைகளிலும் எழும் கர்ணகூடுகள் பளிச்சென்று நம் கண்களில் படுவதற்கு ஒரு மிக முக்கியமான காரணம் முதல் தள ஆரத்தில் வழக்கமாக இடம் பெறும் சாலை இங்கு சாலையாக இடம்பெறாமல் ஆதி தள கோட்டத்தின் கூரை நீட்சி உபபீடங்களில் எழும் தூண்களால் தாங்கப்பட்டு ஆதிதளத்தின் கபோதத்திற்கு சற்று கீழே சாலைப்பகுதி மட்டும் கூரை பெற்று அதன் மேலே மகாநாசிகை போல் அமையப்பெற்று கர்ணக்கூடுகளுக்கு சற்று குறைந்த உயரத்திலேயே முற்றுப்பெறுவதால் முதல் தள ஆரச்சுவரில் கர்ணகூடுகள் மட்டுமே ஆட்சி செய்வது போல் ஒரு தோற்றம் உண்டாகி விடுகிறது.

மேலும் இத்தோற்றத்தை உறுதி செய்ய சோழ சிற்பிகள் கையாண்ட உத்தி அதி அற்புதம். ஆம்; கர்ணகூடுகளின் முதன்மை திசைகளின் மையத்தில் அணைவுத்தூண்கள் பெற்ற கோட்டங்கள் அமைய, அவைகளில் நின்ற கோலத்தில் சிற்பங்கள் இடம்பெற கர்ணகூடுகளின் இரண்டாம் நிலைத்திசைகளில் எழிலார்ந்த ஆடல் மகளிர் இடம்பெற, இக்கர்ணகூடுகள் இவ்வாலயத்தில் சிறப்புடன் அமைந்து கண்களையும் கருத்தையும் ஒருங்கே கவர்கின்றது என்றால் அது மிகையாகாது.