இந்த ஆண்டு, தமிழாக வாழ்ந்து, தமிழர்க்காக வாழ்ந்து, தம் தளரா உழைப்பினாலும் அறிவியல் நோக்கினாலும் இணையற்ற ஆய்வுப் பதிவுகளைத் தமிழ்நாட்டு வரலாற்றிற்கு வழங்கிச் சென்றிருக்கும் அறிஞர் பெருந்தகை முனைவர் மா. இராசமாணிக்கனாரின் நூற்றாண்டாகும். வறுமையும் தனிமையும் சூழ்ந்திருந்த காலத்தும் கிடைத்த துணைகளையெல்லாம் வாழ்க்கையின் முன்னேற்றத்திற்கான ஊன்றுகோல்களாகவே கண்டு, தாமும் வளர்ந்து, தம்மைச் சூழ்ந்திருந்த சமுதாயமும் வளரப் பாடுபட்ட இவ்வரிய மனிதரின் வாழ்க்கை இந்த இதழில் இடம்பெறுகிறது.

ஒரு தனிமனிதன், 'முயற்சி'யின் காரணமாக மட்டுமே எத்தனை உயரமுடியும் என்பதற்கு இராசமாணிக்கனார் சிறந்த சான்றாவார். வாழ்நாள் முழுவதும் மாணவர்கள், இளைஞர்கள் நலம் நோக்கிய சிந்தனையாளராகவே திகழ்ந்த இப்பெருந்தகையின் இலக்கிய, வரலாற்று ய்வுகள் நிகரற்றவை. வரலாறு டாட் காமின் அடுத்து வரும் இதழ்களில் அவை குறித்த கட்டுரைகள் இடம்பெறும்.

இராசமாணிக்கனார் ஒரு புதின ஆசிரியராகவும் திகழ்ந்தமை பலருக்குத் தெரியாது. அவருடைய 'தமிழரசி', 'நாட்டுக்கு நல்லவை' எனும் புதினங்கள் முற்றிலும் சமுதாய நலம் நாடிய நூல்களாக மலர்ந்தன. அவருடைய கனவுகள், எதிர்பார்ப்புகள், குறிக்கோள்கள் இவை அனைத்தையும் இவ்விரு நூல்களிலும் பரவலாகப் பதிவுசெய்துள்ளார். 'நல்லது நடக்கும்' என்ற அவருடைய நம்பிக்கை, பின்னாளில் நிறைவேறியமையை வரலாறு உணர்த்துகிறது.

இராசமாணிக்கனார் ஒரு வரலாறு. அதனால்தான், டாக்டர் இராசமாணிக்கனார் தொடக்கப்பள்ளி, டாக்டர் மா. இராசமாணிக்கனார் இதழியல் ஆய்வுமையம், டாக்டர் மா. இராசமாணிக்கனார் வரலாற்றாய்வு மையம் எனும் அமைப்புகளின் வழி அவர் தொடர்கிறார். வரலாறு நாளும் புதுப்பிக்கப்படுவது போலவே அம்மேதையின் சிந்தனைகளும் இவ்வமைப்புகளின் வாயிலாக நாளும் புதுமெருகு பெற்று வருகின்றன.

இராசமாணிக்கனாரின் நூற்றாண்டு பயனுறு முறையில் தமிழ்நாட்டிற்கும் தமிழினத்திற்கும் வளம் சேர்க்கும் வகையில் அமையும் என்று நம்பிக்கையுடன் இம்முதல் இதழை உங்கள் கையில் தவழவிடுகிறோம்.
this is txt file