எருக்காட்டூர் மிகப் பழைமையான ஊர். தமிழ்நாட்டுக் குடைவரைக் கல்வெட்டுகளில் மிகப் பழைமையானதாகக் கருதப்படும் பிள்ளையார்பட்டிக் குடைவரைக் கல்வெட்டில் இவ்வூர் இடம்பெற்றுள்ளது. இவ்வூரைச் சேர்ந்த தாயங்கண்ணனார் சேரருக்கும் பாண்டியருக்கும் இடையில் நிகழ்ந்த போரொன்றை அகநானூற்றில் (149) பதிவு செய்திருப்பதுடன் முசிறி, பரங்குன்றம் பற்றிய தரவுகளையும் பெய்துள்ளார்.

பொருளீட்டச் செல்ல விரும்பிய தலைவன், அது கூறின், தலைவி பிரிவு தாங்காது துயர் உறுவாள் எனக் கருதித் தன் பயணம் தவிர்த்தான். பிரிவு சொன்னால் தலைவியின் கண்களில் நீர் நிறையும் என்ற சிந்தனை அவனுக்குள் எத்தனை எத்தனை வரலாற்றுப் பதிவுகளை வளையமிடச் செய்துள்ளன!

நீர் தளும்பும் அந்த பெண்ணின் கண்கள் நீண்ட, ஆழமான சுனையிற் பூத்த புத்தம் புது நீல மலர்கள் இரண்டினைப் போல் இருந்தன. இத்தகு அழகு மலர்கள் பூத்த அந்தச் சுனை பரங்குன்றத்தில் இருந்தது. வெல்லும் கொடியினையுடைய மயிலமர் முருகனின் விழாக்களால் சிறந்த அந்தப் பரங்குன்றம், கொடிகள் அசையும் தெருக்களை உடைய மதுரையின் மேற்கில் இருந்தது. மதுரையை ஆண்ட செழியன் நெடிய, நல்ல யானைகளையும் போர்களில் ஈடுபட்டுப் பல வெற்றிகளையும் ஈட்டிய பேரரசன். கடும் போருக்குப் பின் சேரரரின் முசிறியை வென்று அங்கிருந்த அவர்தம் பொற்பாவையைத் தம் வெற்றியின் அடையாளமாகக் கொணர்ந்தமை அப்பெருமான் ஈட்டிய வெற்றிகளுள் குறிப்பிடத்தக்கது.

செழியனால் வெல்லப்பட்ட முசிறி, பெரியாற்றின் வெள்ளிய நுரை சிதறுமாறு யவனர்களின் மரக்கலங்கள் சேரர் மிளகிற்காகப் பொன்னைக் கொணர்ந்து குவித்த வளமான துறைமுகம். இந்தத் துறைமுகம் அண்மைக் காலத்தே அகழாய்வில் கண்டுபிடிக்கப்பட்டுள்ளது. இங்கிருந்து பல அரிய தொல்பொருட்களை அறிஞர் திரு. செல்வகுமார் கண்டறிந்து கட்டுரை ஒன்றையும் வெளியிட்டுள்ளார். தலைவியின் கண்களுக்குப் பின்னால் சங்க காலத்து வரலாற்றையும் வணிகத்தையும் வெளிப்படுத்தியிருக்கும் தாயங்கண்ணனார் வரலாற்று நோக்கர்தானே!
this is txt file