தென்னகத்தை ஆண்ட வேந்தர்களுள் சிலர் கலை வல்லுனர்களாகவும் கவிஞர்களாகவும் இருந்துள்ளதை இலக்கியங்களும் கல்வெட்டுக்களும் எடுத்தியம்புகின்றன. உதாரணமாக முற்பல்லவ வேந்தரான ஐயடிகள் காடவர் கோன் சிவ க்ஷேத்திர வெண்பா பாடியருளினார். கேரள அரசர்களான குலசேகரப் பெருமாள் பல திருப்பதிகளைப் பாடியுள்ளார். அவரது வழி வந்த சேரமான் பெருமாள் திருக்கயிலாய ஞான உலா முதலான நூல்களை ஆக்கியுள்ளார்.

பல்லவ வேந்தரான முதலாம் மகேந்திர வர்மர் மத்தவிலாசம் என்கிற நையாண்டி நாடகத்தை யாத்துள்ளார். அவரது பரம்பரையில் வந்த கடைசி பல்லவ மன்னரான அபராஜித பல்லவரும் தமிழ்ப்புலமை மிக்கவர் என்பதை திருத்தணி வீராட்டனேசுவரர் திருக்கோயில் கல்வெட்டு இனிதே எடுத்தியம்புகிறது.

திருந்து திருத்தணியிற் செஞ்சடை ஈசற்குக்
கருங்கல்லால் கற்றளியா நிற்க - விரும்பியே
நற்கலைகள் எல்லாம் நவின்றசீற் நம்பியப்பி
பொற்பமையச் செய்தான் புரிந்து

மிக எளிமையான சொற்களுடன் அழகாக யாக்கப் பட்டுள்ள இப்பாடலின் கீழ் ‘இவ்வெண்பா பெருமானடிகள் தாம் பாடியருளியது’ என்கிற குறிப்பு காணப்படுகிறது. (ARE 433 of 1905)

திருத்தணித் திருக்கோயிலை கற்றளியாக எடுப்பித்த நம்பியப்பி என்பவரைப் பாராட்டி வேந்தரே எழுதிய வெண்பா இது.
this is txt file