கோயில் கட்டுமானங்களில் பொதுவாக விமானத் தளங்களின் ஆரச்சுவர்கள் நடுவில் சாலைகள் பெற்றும் மூலைகளில் கர்ணகூடு பெற்றும் காணப்படும். விமானங்களின் பரிமாணம் பொருத்துச் சாலை மற்றும் கர்ணகூடுகளுக்கிடையில் ஆரநாசிகைகளும், கர்ணசாலைகளும் ஆரச்சுவர்களில் இடம்பெறும். இவ்வாறு எழும் தளங்களின் முடிவில் எழும் கிரீவம் தனது நான்கு மூலைகளிலும் நந்திகள் பெற்று சிகரம் ஸ்தூபியுடன் விண்ணில் கலக்கும். 

இத்தகைய கட்டுமானங்கள் பொதுவாகப் பல்லவர், பாண்டியர் மற்றும் முற்சோழர் காலங்களிலும் இடைச்சோழர் மற்றும் பிற்சோழர் காலங்களிலும் நாம் காணலாம். ஆனால் ஒரே ஒரு கோயிலில் மட்டும் கிரீவம் எழும் தளத்தில் நந்திகளுக்கிடையில் கர்ணகூடுகளும் பெற்றுக் காண்பதற்கு அரியதாய் அமையப்பெற்றிருப்பது குறிப்பிடத்தக்கது. அது தாராசுரம் ஐராவதேஸ்வரர் கோயில் ஆகும்! இதனை விளக்க மிக முக்கியமான நான்கு கோயில்களின் விமானங்கள் இங்கு எடுத்துக் காட்டப்பட்டுள்ளன. 

குறிப்பாக தஞ்சை, கங்கைகொண்ட சோழபுரம், திருபுவனம் மற்றும் தாராசுரம்! இதில் தாராசுரத்தில் தான் இத்தகைய புதிய அணுகுமுறை பின்பற்றப்பட்டிருக்கிறது! இந்நான்கு கோயில்களுமே சோழர் கலைப்பாணியை உலகறியச்செய்து, நமது கலைவரலாற்றில் அழியா இடத்தைப் பெற்று, அவற்றில் மூன்று உலக பாரம்பரிய சின்னங்களின் வரிசையிலும் இடம்பெற்றமை பெருமையுடன் குறிப்பிடத்தக்கது ஆகும்.

 

/images/Issue-132/StructuralTemple-Chola-Tirubuvanam-Rajarajeeswaram-01.jpg