காக்கையும் காதலும்!

'தோழா, உன் காதலி வீட்டுச் சிறையில். ஏன் தெரியுமா? உன் பிரிவிற்கு வருந்தியதால் உடல் மெலிந்தாள் அவ்வளவில் அவள் கைவளை நெகிழ்ந்தது. தாய் அஞ்சினாள். மகளின் மெலிவிற்குக் காரணம் அறியாளாய், வெளிச் செல்லல் வேண்டாம் என மகளை வீட்டில் நிறுத்தினாள். தோழா, இது நீங்கள் சந்தித்த இடம். இன்றோ, செய்தி தர, நான் மட்டும் இங்கே!'

நற்றிணைத் தோழி (258) தலைவன் கேட்கக் கூறிய தகவல் இது. இதை மட்டுமே அவள் சொல்லி நிறுத்தியிருந்தால், இது, காதல் பாட்டாகக் கரைந்திருக்கும். ஆனால், அந்தத் தோழியை உருவாக்கிய புலவர் நக்கீரரின் பார்வையில் வரலாறு இருந்தது. காதலன் பிரிவு தாங்காமல் மெலிந்த காதலியின் அழகுக்கு உவமை சொல்வது போல் அந்த வரலாற்றை ஒரு காக்கையின் வழியே காதலில் கலந்தார்.

'தோழா, உன் காதலியாம் தலைவி எப்படிப்பட்ட அழகி தெரியுமா? மருங்கூர்ப்பட்டினம் போன்றவள்! அந்த மருங்கூர்ப்பட்டினம் எத்தகையது தெரியுமா? ஊருக்கு வரும் விருந்தினரைப் பாதுகாக்கும்படி வேண்டி, வீட்டுப் பெண்கள் அன்றாடம் சமைத்த உணவின் ஒரு சிறு பகுதியைப் பலியாக வீட்டின் புறக்கடையில் வைக்கும் அளவு பண்பட்ட ஊர்.

மருங்கூர்க் காக்கைகள் பகல் போதில் அந்தப் பலியுணவை உண்ணும். மாலையிலோ, ஊரிலுள்ள அகலமான கடைத்தெருவில் குவிக்கப்பட்டிருக்கும் இறால் மீன்களைக் கொத்திக் கொண்டு பறந்து, பட்டினத்துக் கடற்கரையில் நிறுத்தப்பட்டிருக்கும் கப்பலின் பாய்மரக் கொம்பில் அமர்ந்து உணவு முடிக்கும்.' எத்தனை வளமான ஊர்! தலைவியும் அத்தனை அழகானவள்!

விருந்தினருக்கு உணவிடுவதோடு நிறுத்தாது, அவர்களைக் காப்பாற்றுமாறு இறைவனை வேண்டும் சங்கப் பண்பாடு, பலியிடும் பழக்கம், 'நிமிரல்' எனும் உணவு, மருங்கூர்க் கடைவீதி வளமை, காக்கை, அதன் உணவு, உறைவிடம், மருங்கூர்த் துறைமுகச் செழிப்பு என எத்தனை வரலாற்றுத் தரவுகள்!

this is txt file