கழுதை மேல் ஆடவர் ஒருவர் அமர்ந்திருக்க, அவரைச் சுற்றி மூன்று பெண்களும் ஒரு சிறுவனும் நிற்கும் காட்சி தேர் ஒன்றிலிருந்து கண்டறியப்பட்டது. சிறிய குடுமியும் தொங்கு மீசையும் சுருக்கிய சிற்றாடையுமாய், 'என்னை மன்னித்து விட்டுவிடுங்கள்' என்பது போல் கைகளைக் கூப்பிய நிலையில் கழுதை மேல் அமர்ந்திருக்கிறார் அந்த ஆடவர். என்ன தவறு செய்தார் என்பது தெரியவில்லை! சுற்றியுள்ள மூன்று பெண்களுள் ஒருவர் கழுதைக்கு முன்னாலும் மற்றவர்கள் பின்னாலும் நிற்கின்றனர். பின்னால் நிற்கும் பெண்களில் ஒருவர் உயர்த்திப் பிடித்த சட்டியிலிருந்து எதையோ (சாணக்கரைசல்?) அந்த ஆடவரின் தலையில் ஊற்றுகிறார். இரண்டாவது பெண் காலியான சட்டி ஒன்றை இடக்கையில் பிடித்தபடி, துடைப்பம் பிடித்திருக்கும் வலக்கையை உயர்த்தி அந்த ஆடவரை அடிக்கும் மெய்ப்பாட்டில் உள்ளார். கழுத்தில் கண்டிகை அணிந்த வலப்புறப் பெண் கையில் கொண்டுள்ள செருப்புப் போன்ற பொருளை ஆடவரின் தலையில் அடிக்குமாறு போலப் பிடித்திருக்கிறார். மேலே நடக்கும் இந்தக் காட்சியைப் பார்த்தவாறு வலப்புறம் வயதில் சிறிய பையன் ஒருவன் நிற்பதைக் காணமுடிகிறது.



பெண்கள் மூவரும் சேலை அணிந்திருக்கிறார்கள். இத்தேர் செய்யப்பட்ட காலத்தில் சேலை அணியும் பழக்கம் வழக்கிற்கு வந்துவிட்டதை இதனால் அறியமுடிகிறது. செவியணிகள், தோள், கைவளைகள், கழுத்தணிகள் பெற்றுள்ள இப்பெண்களின் இதழ்க்கடையில் எள்ளல் புன்னகை பளிச்சிடுகிறது.

தவறு செய்தவர்களைக் கழுவேற்றும் காட்சி பல இடங்களில் ஓவியமாகவும் சிற்பமாகவும் இருப்பதைக் கண்டிருக்கிறோம். அது போல இங்கும் தவறு செய்தவர் தலையில் சாணியைக் கரைத்து ஊற்றி, செருப்பாலும் துடைப்பத்தாலும் அடித்துத் தண்டிக்கும் பழக்கம் பதினேழு, பதினெட்டாம் நூற்றாண்டுகளில் ஊரக வழக்கில் இருந்ததாகக் கொள்ளுமாறு இந்தத் தேர்ச் சிற்பம் அமைந்துள்ளது. ஒரு மரத்தச்சரின் வரலாற்றுப் பார்வையை மதுரை மீனாட்சியம்மன் கோயிலின் இந்தச் சிற்பம் வெளிப்படுத்துவதாகக் கொள்ளலாம்.
this is txt file